Nau loss mich yuscht eppes saage!

Guder Daag Blog Leser! Heit waar en wichdiger Daag fer uns die Deitsch schwetze, fer die die Deitsch lanne un fer all die Leit die in die Zukunft unsre Schprooch lanne wolle. Heit waar en Versammling uff re Pennsylvaanisch Deitsch Kuldur Center in Kutzeschteddel. Die Versammling waar fer yunge Leit (unnich 45 Yaahre alt) die die Schprooch behalde wolle. Baut 20 Leit sin zammekumme um neie Ideas iwwerzuschwetze.

Mir hen in re Schulhaus gedroffe. Sell iss en gude Blatz fer Ideas iwwerzuschwetze.

Es waar arrig schee so viele yunge Leit zu dreffe un mit wem ich Deitsch schwetze kennte. Ee paar davun hawwich schunn frieher kennengelannt, awwer ich hab endlich ee paar neie Leit gedroffe, die ich yuscht im Internet kenne! Sell waar eppes, endlich en Gsicht un Schtimm mit en Naame zu hawwe.

Der Bob Reynolds hot aagfange un hot uns bewillkummt.

Die Versammling hot baut 2 Schtunn ausgedauert. Mir hen iwwer viele gude Ideas gschwetzt. Der Michael Werner hot uns verzaehlt wie die Leit im Alsace ihre Schprooch behalde. Er hot gedenkt as mir do in Pennsylvaania aa ee paar vun selle Ideas do aa duhe kenne. Am End hemmer drei Ideas as Ziele gewaehlt:

1. Mir wolle Schtrossschilder in zwee Schprooche haawe. Mir hen gedenkt as mit der College datt in Kutzeschteddel, as mir solle datt aafange. En Mann waar datt vun re Schteddel un er hot gsaat as er waerr die Idea an die Schteddellraad bringe. Mir hen gedenkt as es arrig wichdig iss die Schprooch meh in die Gsellschaft zu bringe. Wann meh Leit sehne unsre Schprooch, waerre sie meh Inderesse hawwe.

2. Fer die Leit die Deitsch lanne wolle, hemmer gewaehlt mit Online Schprooch Klaesse zu mache. Viel Leit hen gsaat as es gebt so viel Videos uff YouTube fer annere Schprooche zu lanne, ferwas gebt es ken fer Deitsch? Mir denke as es net so deier sei waerr, un sie kenne zimmlich schtarrick gemacht sei. Ich glaab as ich un en Freind vun mir waerre damit aafange. Hoffetlich schunn selle Summer.

3. Ee paar Leit hen gsaat as es waerre schee vielleicht en Summer Laager fer Deitschschtudente zu hawwe. Ich find selle Idea arrig gut. Sie kenne ee Wochend odder ee Woch ausdauere. Die Leit die kumme waerr glee bissel Immersion in re Schprooch hawwe. Es kann en Laager fer Aafanger gewwe un es kann en Laager fer Leit die die Schprooch schunn schwetze kenne gewwe. Der Ben Rader hot gsaat as sei Familye en scheene Laager in die Poconos hen un mir kenne uns datt dreffe. Mir misse meh Arewet duh fer selle Idea in die Wirklichkeet zu bringe, awwer ich denk sell waerr eppes schee.

Der Kevin Sterner hot viele gude Ideas ghatt!

Baut zwelf Uhr sin mir drausse gange fer en Drupppickder zu mache. Dann sin mir all heemgfaahre. Sell waar en arrig guder Daag fer uns un abbadich fer unsre Schprooch. Ich kann ehrlich saage as es lebt un es hot en Zukunft mit re Hilf vun viele Leit!

Do is en Audio Klip: Was waerr rauskumme?

Guder Daag Blog Leser! As viel vun eich schunn wisst, bin ich en Yaeger. Ich hab mei ganzes Lewe geyaagt. Mei Daadi, Grossdaadi un mei Bruder sin aa Yaeger. Selle Wochend sin mir widder in der Busch gange um eppes zu schiesse.

Do in Pennsylvaania kann mer zwee Mol im Yaahr Welschhinkel schiesse: im Friehyaahr un im Schpotyaahr. Im Friehyaahr darf mer yuscht en Welschhaahne schiesse, awwer im Schpotyaahr kann mer entwedder en Haahn odder en Hinkel schiesse. Welschhaahne sin abbadich schwer zu yaage weil sie so verdammt gscheit sin! Sie hen arrig gute Aage, die all die Farewe sehne kenne. Deswege muss mer Camouflage draage. Haasch un annere Gediere kenne viele Farewe net sehe, so ‘sis ok wann mer yuscht Arensch draage, awwer sell geht fer schurr net mit Welschhinkel.

Mei Bruder, allsfatt ready!

Im Friehyaahr sin die Welschhaahne in re Laafzeit. Die Haahne versuche die Hinkel zu gewinne, so sie hen glee bissel meh Mut. Was en Yaeger im Friehyaahr duhe muss, iss mer muss der Haahne neirufe. Ya, mer hockt im Busch, in Camouflage un dann muss mer wie en Welschhaahn schpiele. Mei Bruder iss arrig gut mit sell! As er en Kind waar, hemmer oft gsaat: “Aye, Stevie, du bischt en Welschhaahn!”

Mei Daadi bei yaage. Ich glaab as er am schlofe iss.

Geschder, sin ich, mei Bruder un mei Daadi yaage gange. Mir sin schunn um 4 Uhr Wacker! Hemmer glee bissel Kaffie gedrunke un dann sin mir in die Busch gange. Mei Bruder hot en Decoy kaaft. Er hot gedenkt as wann en annere Welschhaahn die Decoy seht, waerr er fer schurr zu uns schpringe um zu wunnerfitze. Well, fer die aerschde Schtunn waar alles schtill. Ich glaab as die Welschhinkel waare nooch im Nescht. As die Sunn uffkumme iss, hot die ganze Busch uffgeweckt. Die Veggel waare am singe, die Eechhaase waare am rumlaafe…alles waar so blessierlich.

Der Busch – frieh am Mariye.

Mei Bruder hot aagfange zu rufe…awwer es hot ken Antwaat gewwe. Er hot baut 15 Minudde gewarde un dann hot er widder browiert. “Hey, ich hab eppes gheert!” hot mei Daadi gsaat. Der Stevie hot widder gerufe. “Gobbel gobbel” hen uns gheert! Bletzlich waar alles uffgeregt! Mei Bruder hot gerufe un der Welschhaahn hot geantwaddet. Yedes Mol hot es gscheint as der Welschhaahn dichter zu uns kumme iss. “Sei ready!” hot mei Bruder gsaat. Ich un mei Daadi waare fer schurr ready. Mir en gewollt er zu schiesse. Hie un her hot mei Bruder un seller Welschhaahn gschwetzt. Sell hot baut 15 bis 20 Minudde ausgedauert. Awwer in die End iss er nett zu uns kumme! Mir hen ihn net gsehne, yuscht gheert. So, mir hen ken Welschhahne zu esse un mir hen aa unsere Flinte net gschosse. So geht es mannichmol bei Yaage! Ich bin am yaage sidder ich 12 Yaahre alt sei…un immernooch hab ich ken Welschhaahne gschosse. Die sin warricklich en Challenge.

Mei Bruder un sei Decoy.

Ich un mei Bruder nooch unsere Zeit im Busch.

Vielleicht waerr es anners im Schpotyaahr sei. Hett eenich-epper vun mei Leser en wilde Welschhaahne gschosse?

Do is en Audio Klip: Welschhaahne yaage!

Guder Daag Blog Leser! Well nau is der Abrill schunn vorbei. Abrill un Moi hawwich gaarn. Es Friehyaahr bringt so viel: frische Geruche, frische Farewe un waarme Temperatures. Ich hab gedenkt as selle Woch waerr ich en Lischt vun Wadde fer es Friehyaahr gewwe.  Die Wadde, die ich gewaehlt hab, sin die Wadde die Friehyaahr zu mir saage.

die Amschel - die sin die aerschde Veggel zerrick nooch em Winder zu kumme.

der Bittreselaat / der Pissebett - der waxt in em Graas. Ich ess der arrig gaarn mit heese Schpeckbrieh un Oier.

die Dullebaan - die kumme in so viele verschiddliche Farewe!

die Pingschtblumm - die hawwich arrig gaarn. Uff re Bauerei wu ich uffgewaxne bin hemmer viel Pingschtblumme ghatt. Nau wann ich sie seh odder riech, denk ich graad uff mei Heemet.

die Gichtros - Uff unsre Bauerei hemmer aa viel Gichtrosse ghatt. Ich gleich die Iemense zu schaue, sie fresse die Blumme uff...un dann rieche sie so gut!

die Schisselblumm - die kumme arrig frieh in es Freihyaahr. Heitzudaag sin die Schisselblumm die Symbol fer die Amerikaanische Grebs Gsellschaft.

es Hundsholz - eene die aerschde Beem die ihre Blumme griege iss die Hundsholz. Ich hab een in mei Gaarde un 'siss in vollblumm...guckt arrig schee aus.

Bockbier - es Friehyaahr iss nicht yuscht Blumme un Veggel. Ich lieb es Freihyaahr aa fer es Bockbier! Bockbier iss en Bier es yuscht im Friehyaahr gedrunke iss. Der Yuengling Brauerei macht en arrig gude Bockbier.

Die sin yuscht ee paar Wadde fer es Friehyaahr. Welle Wadde sin Friehyaahr zu eich? Schreib mich en Comment un loss mich mol wisse!

Guder Daag Blog Leser! Ich hoff as alle vun eich en arrig gute Oschder ghatt hett. Mei waar arrig blessierlich, ich bin nadierlich uff em Karrich gange, hab viel gude Esse gesse un hab Zeit mit meinre Familye gebracht. Selle Woch will ich nix meh iwwer Oschder saage, ich will vun was uff em Oschdermundaag bassiert iss: Die Pennsylvaanisch Detisch Versommling vun Barricks Kaunty! Ya, Barricks Kaunty, mei Heemet! Selles Yaahr waar es der dreiunsiwwezichscht Versommling. ‘Siss allsfatt uff em Oschdermundaag un wie letschdes Yaahr waar es in die Leesport Vendu Ess-schtubb.

Alles iss graad um halwer sechs Uhr aagfange. Mir waare vun der Formeeschder, der Richard Hassler, zu Odder gerufe. Dann hemmer “Amerikaa” gsunge. Do iss der aerschde Vaerscht:

Mei Land, ich sing vun dir

Siess iss die Freiheit mir,

Do will ich sei;

So wie die alde Leit,

So fiehl ich aa nooch heit.

Sin Dir zu yedre Zeit

Allsfatt gedrei.

Nooch em Singe, hot die Happy Dutchmen viel Myusick gschpielt. Dann hemmer die Verschprechnis zum Faahne gsaat. Mer kann net saage as die Deitsche net patriootisch sin!

As dihr sehne kennt, hot viel Leit uff re Versommling gewwe!

Dann hot der Lee Heffner en Gebet gewwe. Nau waar es Zeit zu esse. Der Gross John hot en arrig gude Tschop geduh. Mir hen: Salaat mit Seideschpeck Brieh, Sauere Kuddlefleck, gerooscht Seifleesch un gebackne Hinkelschenkel, Grummbierefilse, Dunkes, Grautselaat mit Rahm, Arebse un Gehlriewe, Welschkann, Lattwaerrick mit Schmierkaes, Brot un Budder un fer Noochesse, Kokonuss Kustard. Alles waar ganz appeditlich.

Nooch em Esse hemmer meh Schitcke gsunge. Dann der Ed Quinter hot iwwer es Deitsche Programm uff em Kutztown University gschwetzt. Fer glee bissel meh Enterntainment hen die Miller Brieder gsunge un Gschichte verzaehlt…die waare arrig luschdig! Der Schwetzer fer es Owed waar der John Rausch. Er hot viele Gschichte gsaat un ee paar Witze verzaehlt. Er hot iwwer viel Detische Sauwerkeete wie Schpaarsamkeit un Hattschaffigkeit gschwetzt.

Dem Ed Quinter sei Schtudent am schwetze.

Nooch der Schwetz hemmer “Gott, Segen Amerikaa” gsunge un dann sin mir nooch Heem gfaahre. Es waar en gude Owed un es waar arrig gut mit annere Leit Deitsch zu schwetze. Ya, unser Schprooch iss nett dod! Es lebt! Un ich glaab es hot viel meh Yaahre zu geh!

Do is en Audio Klip: Die Pennsylvaanisch Deitsch Versommling!

Guder Daag Blog Leser! As ich en Kind waar hemmer zwee Telephones daheem uff re Bauerei ghatt. Een waar in der Kich un die annere waar in meine Eldre ihr Bettschtubb. Allebeed hen en Cord ghatt un wenn mer epper aarufe wott, hot mer gemisst die Nummere auswennich zu wisse. Die Telephone kennt yuscht ee Ding duh: epper aarufe.

Schpeader in mei Kindheit hemmer en Telephone mitaus en Cord grickt. Ich hab gedenkt as sell wunnerbaar waar. Mer kennt darrich es Haus laafe un schwetze mit epper uff re Telephone! Dann als ich baut 18 Yaahre alt waar hawwich mei aerschde Cell Phone grickt. Waar sell eppes! Nau kennt ich in mei Maschine faahre un uff meinre Telephone schwetze! Awwer zu sellre Zeit kennte die Cell Phones yuscht annere Leit aarufe.Well, heitzudaage iss sell net meh die Regel. Nau, die Froog iss: was kann unsere Telephones net duh? Gell? Letschde Woch bin ich zu meinre Verizon Schtor gange weil es Zeit waar fer mei Vertrag zu erneie. Wenn mer sei Vertrag erneie muss, kann mer en neie Telephone griege.

Ich hab en neie iPhone gewaehlt. Ich muss ehrlich saage as ich arrig uffegregt waar fer en iPhone zu bekomme. Die letschde zwee Yaahre hab ich en Blackberry ghatt. Blackeberries un iPhones sin was mir saage: Gscheitphones. Die sin Telephones die nadierlich Leit aarufe kenne, awwer sie kenne so viel meh aa duh: E-Poscht checke, im Internet surfe, Pickders mache, VIdeos schaue un mache, Schpiele schpiele un meh un meh un meh. Mei iPhone hot die meeglichkeit vun iwwer 500,000 Apps zu waehle. 500,000! Harrieyesses!

Geschder hawwich mit meinre neien iPhone “geschpielt”. Ich hab en App gedownloadet der heest: TuneIn. Sell iss en App as mir erlaabt Radio Stations vun all iwwer re Welt zu heere! Ya, uff mei Weg zu re Arewet geschder, hawwich en Radio Station in Mainz, Deitschland aagharicht! Dann schpaeder geschdrowed, hawwich mei gude Freind in Michigan aagerufe, awwer mir hen es mit FaceTime gemacht. FaceTime iss warricklich eppes! Ya, mir hen mit enanner gschwetzt, awwer mir hen aa mit unser Telephone enannere lewendig gsehne! Mit unsre Telephone un ihre Cameras, kennte mir enannere sehne un zu gleiche Zeit schwetze! Sell iss yo doch eppes!

Ich un mei neie iPhone!

Wann ich zerick uff mei Kindheit denk, denk ich as alles so eifach waar. Un vielleicht waar sell besser, awwer unser Technologie kann aa gut duhe! Ich bin sicher as viel vun mei Blog Leser schunn en Gscheitphone hen. Welle Apps gleicht dihr? Wollt dihr mit mir glee bissel FaceTime mache?

Do is en Audio Klip: En Telephone kann sell duh?

Guder Daag Blog Leser! Vor ee paar Woch hawwich en Blog Poscht gschriwwe, un drin hawwich gsaat as mei Fraa un ich mit Kind waare. Well Geschder waare mir mit der Bopplidoktor fer en Aaschtelling un Checkup. Aersch hemmer en Ultrasound ghatt. Die Abwaardern hot so viele Pickders vun em Boppli gemacht. Die Technologie heitzudaag iss warricklich was! Mir hen schier gaar alles gsehne. Mir hen der Hatz, der Rick, der Kopp, zwee Beh, zwee Axel, un zwee Erem gsehne. Sie hot gsaat as sie 30 Dinge checke misse…un sie hot so viel gcheckt.

Dann waar es so weit kumme. Die Abwaardern hot gsaat, well wollt eich wisse was es iss? Nadierlich hemmer gsaat: Ya! mir sinn allebeed A1 Personalities un mir misse wisse was kummt! So die Abwaardern hot gsaat, well do iss es: dihr waerrt en Maedel hawwe. Ich muss ehrlich saage, as ich hab en Bu gewollt awwer es gebt nix as mir nau duhe kenne! Gell! Ich fiehl mich glee wennich wie der Keenich Henry der Achte! En Maedel, wann er en Bu gebraucht hot!

So nau muss ich mei Sicht ennere. Ich muss saage as ich weess net so viel vun Maedels! Ich hab en Bruder ghatt un fascht all mei Familye waare Buwe. So es waerd en neie Erfaahring sei. Mei Fraa hot gsaat, du musscht lanne wie mer Keenichsdochder schpiele! Keenichsdochder schpiele?! Ya vielleicht, awwer es kann aa sei as es Maedel viel Schport schpiele waerrd. Mir kenne es nix wisse was kummt. Ich hoff yuscht zwee Dinge: as sie arrig gsund iss, un as sie Myusick gleicht! Die Abwaardern hot gsaat as alles sehr gut guckt.

Heit bei Mariyets-esse waar mei Kopp voll mit Gedenke uff re Zukunft. En Maedel…aye aye aye. Mir misse fer en Hochzich bezaahle! Ich weess as sell weit in re Zukunft iss, awwer wie ich frieher gsaat hab, ich bin en A1 Personality! Oh, un hab kenn Bang: sie waerrd Deitsch fer schurr lanne un schwetze!

Do is en Audio Klip: Es waerd en Maedel gewwe!

Guder Daag Blog Leser! ‘Sis Matz awwer mer daet es net wisse! Es Wedder do in Pennsylvaania iss eppes schunnscht. Selle Woch hemmer siwwe Daage vun Sunn un arrig warme Temperatures. Schier gaar yeder Daag waar es baut 70 Graad!

Matz iss normally kiehl un nass. Normally waerre mir nooch Schnee un vielleich glee bissel Eis hawwe. Awwer net selles Yaahr. Unser Winder do in Pennsylvaania waar arrig mild. Mir hen fast ken Schnee ghatt un mir hen yuscht zwee odder drei Daage mit Temperatures die wennich vun 15 Graad waar. Mannichmol hemmer leichter Winder, un selle Winder waar so vun eener.

Nau iss es Matz un ich hock do am Disch un mei Dier iss uff un ee paar Fenschder sin aa uff! Geschder hemmer uff mei Bortsch gehockt un ee Bier gedrunke. Sell waar es aerschde Mol as ich errinere kann as ich mei Bier fer Sankt Patricks Daag drausse gedrunke hab!

Aa Geschder waar ich schunn in mei Gaarde! Ich hab die ganze Gaarde gebaut. Weil mir fast kenn Schnee ghatt waar es Grund arrig drucke. Sell find ich fer schurr net gut. Normally hemmer Schnee ghatt un Schnee der uff em Grund bleibt. Awwer die Temperatures waare net so selles Yaahr un was Schnee mir grickt hen waar schnell gschmolse.

Wann die Temperatures so bleibt, kann es sei as mir schunn im Friehyaahr en Drickning hawwe kennt. Mol sehne was kummt. Es letschdes Yaahr waar unser Friehyaahr un Summer arrig nass. Mir hen zu viel Rege grickt, es Grund waar zu nass fer die Blanse un die Bauere hen viel Brobleme ghatt. Nau selles Yaahr guckt es as vielleicht es Gegedeel sei waerr. Ich hoff net! Ich will en gude Ern hawwe un viel Gaardesache esse un kanne.

Was denkt eich? Wie waerr unser Friehyaahr rausschpiele? Warm un drucke?

Do is en Audio Klip: Summer in Matz?

Guder Daag Blog Leser! Well do bin ich widder mit em neien Blog Poscht. Selle Woch will ich en annere Aadeel vun mei Wichdiger Deitscher Series schreiwe. Selle Aadeel is iwwer en Mann vun meinre Heemet: Centre Taunschip, Barricks Kaunty. Hett dihr gwisst as der zwett-beschde March schreiwer en Deitscher waar? Ya, sell iss ken Lieg! Nadierlich wann mer vun March Myusick denke, denke mir graad vun dem John Philip Sousa. Er waar der March Keenich, un er hot der Naame verdient. Awwer der March Prins muss der Monroe Althouse sei!

Der Monroe ALthouse in sei Baend Uniform.

Der Monroe Althouse waar uff em 26. Moi im Yaahr 1853 in Centre Taunschip, nett so weit weck vun Wescht Leesport gebore. Er waar de Jonathan un Mary Althouse ihr Soh un er waar uff der Familiye ihr Bauerei uffgewaxe. As en Kind waar er arrig begaabt. Sei aerschde Inschtrument waar die Geig un dann schpeeder hot er der Trombone un der Baritone Horn glannt. Er iss mit der Buffalo Bill’s Wild West Show gereest un sei aerschde Lied waar fer sell gschriwwe.

Im 1880, nooch glee wennich Zeit in en Zigar Schtor un en Hut Kumpanie waar er as Professional Myusiker genannt. Er hot mit yede Drupp in Reading gschpielt. Er hot oft mit der Ringgold Band gschpielt un schpeeder waar er der Myusick Direktor fer sie. Er waar arrig bekannt fer sei Gaab um Marches zu schreiwe. Er kennt Marches fer yede abbadiches Geleyeheit schreiwe. ‘Sis geglaabt as er meh as 150 Marches gschriwwe hot! In de 1890s hot sei Baend oft in Atlantic City gschpielt. Im Yaahr 1912 hot er un sei Baend fer dem Bresident Woodrow Wilson sei Innauguration gschpielt.

Der Logo vun der Ringgold Baend. Der Monroe hot sie fer viele Yaahre gfiehrt.

Der Monroe iss uff em 12 Oktower im Yaahr 1924 gschtarewe. Der letschde Schtick as er directed hot waar der Stars and Stripes Forever. Sell iss gut weil der John Philip Sousa en guder Freind vun dem Monroe waar. Viel grosse Myusick Leit saage as Althouses Marches die beschde Schtross Marches aller Zeit sin.

YOUTUBE VIDEO CLIP vun der Reading High School ihr Baend. Sie schpiele dem Althouse sei  “Tall Cedars March”.

Un nooch was: der John Philip Sousa iss nooch Reading im Yaahr 1932 kumme um en Anniversary Konzert mit Althouses Ringgold Baend zu gewwe. Bedauerlicherweese iss er in Reading der Nacht bevor dem Konzert gschtarewe.

Do iss en Audio Klip: En wichdiger Deitscher- Aadeel 4!

Guder Daag Blog Leser! Well do bin ich widder mit em neien Blog Poscht! Selle Woch hawwich die Freihyaahr Hitz. Ich glaab as viel vun eich sie aa hett, gell? Vielleicht ennich-epper wisst net was die Freihyaahr Hitz iss? Ich weess as es hot en annere Naame aa: die Blockhaus Hitz. Ennichhau, die Freihyaahr Hitz iss wann mer ready fer es Friehyaahr iss awwer ‘sis nooch net Friehyaahr. Ich hab genunk vun in em Haus zu sei…ich will raus! Ich will in mei Gaarde schaffe, ich will Blume sehne un rieche, ich will mei Graas maehe un viel annere Dinge aa!

Die letschde Woch hemmer do, wu ich wuhn, en gleene Gschmack vun em Friehyaahr ghatt. Die Temperatures waare zimmlich mild un die Sunn waar arrig hell. Ich bin raus vun re Arewet kumme un ich waar so froh die Sunn zu sehne. Awwer, ich weess, viel vun eich waerret saage: Nau Douglas, ‘sis yuscht Matz! Der Winder iss nooch nett vorbei un es Friehyaahr iss nooch nett kumme. Ich weess, ich weess, awwer deswege saag ich as ich die Friehyaahr Hitz hawwe…un ich hab es arrig schlecht. Ich denk der ganze Daag uff warmen Wedder un grien Graas. Ich kann frische Gaardesach aus mei Gaarde schmacke. Ich will mei Motorcycle faahre un ich will fische geh. Aye yummer, ich weess net was ich duh soll. Es Friehyaahr kann nett schtarrig genunk kumme.

Wie iss es fer eich? Seid dihr aa ready fer es Friehyaahr? Ich glaab mir misse nooch ee paar Woch waarde bis es Friehyaahr do iss.

Do is en Audio Klip: Die Freihyaahr Hitz!

Guder Daag Blog Leser! Well nau sin mir in re Faschtzeit. Ya, Dinschdaag waar Faschnacht. Uff em Samschdaag hawwich schunn mei Faasnachtkuchli gemacht. Dann hawwich sie die naegschde drei Daag arrig oft gesse. Die waare so appeditlich. Dann is der Aschermittwoch kumme. Nadierlich bin ich in re Karrich gange um mei Asche zu griege. Ich find em Aschermittwoch sei Gottesdinscht arrig beweglich. Wann der Paare saagt “Errinere, as du vun Schtaab kumme bischt, un in Schtaab witt du zerickgeh” muss ich viel uff selle Wadde denke. As en Soh vun re Familye vun Bauere find ich selle Wadde meenigvoll. Nau misse mir 40 Daage waarde bis Oschder. Normally, Leit solle eppes abgewwe darrich die Faschtzeit. Ich un mei Fraa hen ausgemacht, ken Rinsfleesch zu esse. Ich glaab sell waerd net so hart sei.

Awwer Aschermittwoch hot en annere alde deitsche Tradition: die Aschepuddel. Kennt dihr sell? Tradition saagt as der Paerson der am letsch aus em Bett uff em Aschermittwoch kummt iss die Aschepuddel. Die Aschepuddel iss net en gude Ding zu sei. Tradition saagt as die Aschepuddel alle die Hausarewet fer der Daag duhe muss. Un die annere Familyeleit kenne nadierlich der ganze Daag Gschpass mit re Aschepuddel hawwe. In de Alde Zeite wann die Aschepuddel en Kind waar, hen die Aschepuddel aa die Arewet an die Schul duhe muss. Zum Beischpiel hot die Aschepuddel gemisst die Asche rauszunemme.

En annere alde Tradition fer Aschermittwoch waar as der Mann vun em Haus all die Asche zammegrickt hot un dann hot er all die Kieh un annere Gediere mit de Asche aagschpritz. Tradition saagt as wann er sell geduh hot, waerre die Gediere ken Leis griege.

Die zwee Traditions sin schier gaar vergesse. Sie sin mit re Zeit un Yaahre gschtwarewe. Awwer, ich muss saage as ich der aerschde aus em Nescht uff em Aschermittwoch waar. Sell meehnt as mei Fraa die Aschepuddel waar. Un nadierlich hawwich sie sell gsaat un hot sie gemacht all die Hausarewet zu duh. Ich glaab sie waar net so froh fer sell awwer mer muss die Traditions behalde…Gell?

Do is en Audio Klip: Ich waar net die Aschepuddel!